منتديات فرفشه


 
الرئيسيةس .و .جبحـثالتسجيلدخول

شاطر | 
 

 ادي حال الاعلام المصري!!!

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
بنت اهلاوية
مـشـرفه ســابـقـه

مـشـرفه ســابـقـه
avatar

انثى
عدد الرسائل : 656
الهوايات : الرسم_الرياضة
المهنه : طالبة
اوسمه التميز :
تاريخ التسجيل : 25/07/2007

مُساهمةموضوع: ادي حال الاعلام المصري!!!   السبت أغسطس 04, 2007 3:48 pm

هذا الموضوع منقول من احدى المواقع الرياضيو واتمني ان يحظى باعجبكم

استوديوهات التحليل.. نحتاية 'سيد كفتة'!!

يلاّ يا جماعة نستعد هنبقى على الهوا بعد 3، 2، 1 يلاّ.. هوا
- نتعرف على سيادتك يا فندم

- 'سيد كفتة' رئيس تحرير مجلة السعادة والهنا الرياضية والمحلل الرياضي بقناة الفرحة والانبساط.. ههه.. أنا مبسوط قوي النهاردة إني شفتكم!!

- رأيك إيه في مباراة الأهلي وبنفيكا

- فريق بنفيتا.. غني عن التعريف طبعا وهو فريق محترم.. بس أنا باقول برضه إن النادي الأهلي كبير.. كبير بجماهيره بناسه وبمجلس إدارته اللي فيه ناس زي الفل.. زي الفل والله.

- أيوه.. رأي حضرتك في المباراة إيه.. الماتش يعني!!

- آه طبعا.. النادي الأهلي فريق كبير.. وكسب علشان هو بطل القرن.. هي دي محتاجة كلام.

- طب أكتر واحد عجبك في اللقاء.

- الكابتن 'عماد متعب'.. لأنه كان مجتهد جدا في الماتش ده!!

- تقصد 'فلافيو'.. 'عماد' مالعبش!!

- أنا قلت 'عماد'.. هههههه.. إنت عارف بقى اللعيبة دلوقت بالحاجات والتقاليع اللي بيعملوها بقوا شبه بعض!!

فاصل ثم نتواصل..

أثناء الفاصل

- إيه يا أستاذ يا محترم إنت مش قلت هنتكلم عن صفقة 'حسني عبد ربه'.. مش متابع أنا غيرها، لازم الإحراج ده.

- معلش يا أستاذ 'كفتة' هنتكلم عن 'حسني عبد ربه' بعد الفاصل.

بتعرف تقول اللعيبه دي ماعندهاش ثكافة كروية.. شاطر قوي وجدع ولما حد يسألك عن حال الكرة في موزمبيق بتعرف تقول 'احنا ماعندناش احتراف اللي عندنا ده اسمه انحراف.. بلاش تهريج'، وتقوم معدول من على الكرسي وتبرق للكاميرا، ولما بتتسأل عن أسباب إخفاق أو هزيمة المنتخب الوطني بجميع مستوياته –اللهم لا حسد- بتعرف تقول 'المنظومة دي لازم تتغير.. اتحاد الكرة ده فاشل'، شجاع قوي سعادتك وتقدر تهاجم اللي يعجبك على الهوا وتقطع فيه.. وأول ما ييجي لك على التليفون تبص في السقف وتقول له أنا ماقلتش كده وبعد ما يقفل تحدفه بأزايز المية اللي موجودة في الاستوديو.
لو عندك كل المهارات الفتاكة دي أبشر يا سيدي، أولا هتبقى محلل قناة البلوظة الرياضية قريبا وما أكثر قنوات البلاليظ –جميلة بلاليظ دي- وكمان 10 أيام من عملك كـ'بلوظة' كبير هتركب عربية مبلوظة وفخمة وحاجة آخر عجب، وهيبقى لسعادتك مكتب محترم وكل الجرايد والمجلات هتجري ورا سيادتك على اعتبار إن شخبطة قلم سعادتك تخطيط لمستقبل الكرة المصرية، ده غير بقى الامتيازات التانية اللي هتحسس الناس إنك ولا مؤاخذة عفريت، يعني. نفتح الراديو نلاقي حضرتك.. نفتح التليفزيون برضه نلاقي سعادتك فيه، ندخل على النت.. نخش على الفضائيات.. نفتح حنفية المية.. ننام نحلم بيك، باختصار كده زي ما بيقول اللمبي 'هتلاقيني ناطط لك في حلمك.. في سريرك.. في بنطلونك'.

بصراحة لا أعرف ولا أجد سببا منطقيا واحدا لاستوديهات التحليل اللوذعية الألمعية التي فلقت القنوات الفضائية والأرضية دماغنا بها ليل ونهار ولا أجد مسمى مقنعا لها سوى استوديوهات السبوبة والنحتاية، ويكفيك أن تعلم أن هناك ما يسمى في هذه الاستوديوهات بميزانية الضيوف، هذه الميزانية تمنح للي سعادتك بتشوفه بيخترع أدامك من 500 إلى 1000 جنيه وكله حسب اسم الضيف إذا كان نجم ولسه معتزل أو إذا كان ناقد رياضي أو بتاع بطاطا وطبعا حسب اسم المحطة وحجم وصولها للجماهير.

ويكفيك أن تعلم أيضا أن أغلب -بل أكثر- اختيارات هؤلاء الضيوف لا يوجد لها معيار ثابت –كالكفاءة والخبرة- سوى معيار واحد فقط هو معيار التظبيط من جميع النواحي المادية والمعنوية.

استوديوهات تحليل مباريات كرة القدم في مصر بشكلها الحالي وأسلوبها عمل من لا عمل له، وعد كده على صوابع إيديك 5، 6 شخصيات فقط يمتلكون قدرة حقيقية على تحليل المباريات والباقي كله جاي يهرج ويقول كلمتين يسترزق بيهم وخلاص.

وأستحلفكم بالله حد يقول لي 'فاروق جعفر' يبقى محلل رياضي على أي أساس يعني، أيوه منين يكون خبير كروي، آه كان لعيب جامد على عيننا وعلى رأسنا لكن تقول لي خبير أقول لك أنا كمان خبير، هي حكاية يعني!!

اللطيف بقى في هذه الاستوديهات إنك لما تحصر الوقت اللي حللوا فيه الماتش هتلاقيه كله إعلانات × إعلانات يتخللها 10، 15 ثانية يسأل المذيع فيها السؤال ويجاوب برضه عليه علشان يلحق يطلع الفاصل، يعني الراجل يكون بيتكلم في الماتش يخرجك على إعلانات السمنة والصابون والشامبو.

ده الألطف كمان، إنك لو ركزت في الكلام اللي بيتقال فيها، وحفظت المصطلحات دي 'ثقافة كروية، منظومة، خبرة كبيرة، لعيب مهاري واعد، أداء رجولي، فكر واعي' بكرة الصبح هتلاقيهم بيتصلوا بيك علشان تحلل مباريات الدوري الإسباني، طب بلاش تحفظ ركز بس في الكلام ده وانزل اسأل الحاج 'كبارة' معلم القهوة اللي تحتيكم رأيك إيه في الماتش وشوف هيقول لك إيه!!

بعدين تبص بقى للضيف اللي بيحلل –المباريات طبعا مش حاجة تانية- يا إما تلاقيه مدرب فاشل ماسك فرقة بيتغلب بيها من طوب الأرض وتاريخه ما يعلم بيه إلا ربنا يا إما تلاقيه لعيب لسه معتزل وقبل ما يعتزل ماكانش بيلعب كرة أصلا، وقليل قوي اللي تلاقيه دارس وعنده فكر وثقافة حقيقية وأظن دول معروفين جدا زي الكابتن 'طه إسماعيل' و'علاء صادق' وكام اسم كمان، والباقي جاي يشتغل نفسه زي الناقد والمحلل الرياضي الكبير اللي نفخ صدره على الآخر عقب مباراة الأهلي والإسماعيلي في كأس مصر واستعد ليتكلم وكأنه العالم بالأسرار الكونية الخفية: 'جوزيه ضحك على الناس كلها، الكل فاكر إن 'محمد بركات' كان بيلعب باك شمال بس هو الحقيقة بيلعب في خط النص وبيزيد عاى قدام بس متطرف شوية في ناحية الشمال'.. بعدها بدقيقة قال 'بركات' بنفسه في تصريح لنفس القناة: 'الحمد الله كلنا لعيبة في النادي الأهلي تحت أمر الجهاز الفني وبننفذ تعليماته، ولما طلب مني إني ألعب باك شمال نفذت كلامه والحمد الله أديت المطلوب'!!

رجعت الكاميرا على صاحبنا عمل نفسه مش واخد باله!!!
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
Admin
مـدير المنتـدى

مـدير المنتـدى
avatar

ذكر
عدد الرسائل : 1700
الهوايات : تصميمات ونت
المهنه : محاسب
مزاجى :
علم الدوله :
اوسمه التميز :
تاريخ التسجيل : 03/07/2007

مُساهمةموضوع: رد: ادي حال الاعلام المصري!!!   السبت أغسطس 04, 2007 3:54 pm

هههههههههههههههههههههه

سيد كفته

باين عليكى رياضيه جامد اوى اوى وبتحبى الكوره

موضوع جامد اوى اوى اوى شكرا ليكى

_________________
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
بنت اهلاوية
مـشـرفه ســابـقـه

مـشـرفه ســابـقـه
avatar

انثى
عدد الرسائل : 656
الهوايات : الرسم_الرياضة
المهنه : طالبة
اوسمه التميز :
تاريخ التسجيل : 25/07/2007

مُساهمةموضوع: رد: ادي حال الاعلام المصري!!!   السبت أغسطس 04, 2007 4:01 pm

انا فعلا بحب الكورة جدا
ومرسي على ردك
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
ادي حال الاعلام المصري!!!
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
منتديات فرفشه :: منتديات فرفشه العامه :: المنتدى الرياضى-
انتقل الى: